ದುಂಬಿ ಮರೆತಿದೆಯೇನು ಈ ಹಳ್ಳಿ ಹೂವನ್ನುಗಾಳಿ ತೊರೆದಿದೆಯೇನು ಈ ಗಂಧವ ?
ಗಿಡವೆ ಮುನಿದಿದೆಯೇನು ಈ ಭೂಮಿ ತಾರೆಯಲಿ
ಕಡಿದಿದೆಯೆ ಮುಳ್ಳುಗಳು ಈ ಬಂಧವ?
ಎಳೆಬಿಸಿಲ ತೋರದೆಯೆ ಮೋಡ ಮರೆಯೊಳಗಿಂದ
ಬಂದಿಹನು ನೇಸರನು ನೆತ್ತಿಮೇಲೆ
ಹೂವು ಬಾಡಿಯೆ ಇಲ್ಲ , ಅಂದಕ್ಕೆ ಸಮನಿಲ್ಲ
ಏನಿದರ ಒಳಗುಟ್ಟು ? ಸೃಷ್ಟಿಲೀಲೆ !
ಬಯಕೆ ಸೊರಗಿದೆ ಮಲ್ಲೆ ;ಬೇಕು ಕಹಿ ಬಾಳಿನಲಿ
ಇಲ್ಲವಾದರೆ ಸಿಹಿಯ ರುಚಿಯು ಗೊತ್ತೇ?
ಏನಾದರೇನಂತೆ ಕೊರಗದಿರು ಓ ಹೂವೆ
ಕಡಲೊಳಿಹುದು ನೋವು , ಅದುವೆ ಮುತ್ತೇ !!
ನಿನ್ನ ತೊರೆದವರೆಲ್ಲ ಬಂದೆ ಬರುವರು ಬಳಿಗೆ
ಬರದಿದ್ದರೇನಂತೆ ಹೊಸ ದುಂಬಿ ಬರಲಿ !
ಗಗನ ದೀಪಿಕೆ ನೀನು ,ಹೊನಲ ಭೂಮಿಕೆ ನೀನು
ಎಂದೆಂದಿಗೂ ನಿನ್ನ ನಗೆ ಮೊಗ್ಗರಳಲಿ !
೦೭/೦೧/೨೦೦೫
No comments:
Post a Comment