Monday, August 15, 2011

ಕೆಂಪು ಮೇಫ್ಲವರು


ಕೆಂಪು ಮೇಫ್ಲವರು ಈ ಮರದ ಹೆಸರು
ಈ ಮನೆಯ ಎದುರಿತ್ತು ಬಿಗಿಯಿತ್ತು ಬೇರು !

ಮನೆಯೊಡತಿ ಬಲುಜಾಣೆ ಹೆಸರೇನೊ ಕಾಣೆ
ನೀರೆಯದಿದ್ದರೂ , ಪಾತ್ರೆ ತೊಳೆದವಳು ತಾನೆ

ನೆತ್ತರಿನ ಕೆಂಪು ಅದು ಗೊಂಚಲಿನ ಹೂವು
ಮೇ ತಿಂಗಳಲಿ ಮರವು ಮರೆಸುವುದು ನೋವು

ಮನೆಯ ಮಾಡನು ನೋಡೆ ಹುಳು ಹಿಡಿದ ಸಂತೆ
ಹೆಂಚಿನ್ನೂ ತರುಣ, ಮರದವುಗಳು ಮದುಕನಂತೆ

ಈ ಸಂಜೆ ಮನೆಯಾಕೆ ಮರದ ಬಳಿ ಬಂದು
ಇನ್ನೆರಡೆ ತಿಂಗಳಿವೆ, ಹೂಗಳನೆ ನೆನೆದು

ಬಂದಿದ್ದ ಸಂತಸದಿ ಆ ದಿನದಿ ಗಂಡ
ಮರನೋಡಿ ನಸುನಕ್ಕ ಬಲಿತಿತ್ತು ಕಾಂಡ

ಮರುದಿನವೆ ಕರೆತಂದ ಮರಕಡಿವ ಮಂದಿ
ಮರದ ತೋಳುಗಳೆಲ್ಲ ಬಡಗಿಯೊಳು ಬಂದಿ

ಈಗಿಲ್ಲ ಮರದಚ್ಚು ಆ ಮನೆಯ ಪರಿಸರದಿ
ಬಾಗಿಲೊಳು ಮರದ ಹೂ ನಗುತಿಹುದು ಮುದದಿ !

೦೮.೦೮.೨೦೧೧

No comments: