ಕಾಯುವುದು ನಿನಗೆ ನಾ, ಬೇಯುವುದು ನೆನೆದು ನಾ

ಕಾಯುವುದು ನಿನಗೆ ನಾ, ಬೇಯುವುದು ನೆನೆದು ನಾ
ನೋಯುವುದು ಸರಿಯೆ ನಾ, ಹೇಳು ನೀನು
ನಿನ್ನ ಕನಸನು ಹೊತ್ತು, ಅವಕೆ ಆಸರೆಯಿತ್ತು
ಅದಕಿಷ್ಟು ಮೆರುಗು ನಾ ತುಂಬುತಿಹೆನು

ನಿನ್ನ ಜೊತೆಯಿರೆ ನಾನು ಬೆಟ್ಟಗಳ ಕುಣಿಸುವೆ
ಕಾಲುದಾರಿಗೆ ಹೂವ ಚೆಲ್ಲಬಲ್ಲೆ!
ಬರದೆ ಹೋದರೆ ನೀನು, ಇವು ಎನ್ನ ಕೆಣಕುವುದು
ಹೇಗೆ ನಾ ಏಕಾಂಗಿ ನಡೆಯಬಲ್ಲೆ?

ಹುಚ್ಚುಹಿಡಿಸುವ ನಗುವು;ಮಳೆಗರೆವ ಮಾತಿನೊಳು
ನನ್ನಂತರಂಗವನು ತುಂಬಬಲ್ಲೆ
ನಿನ್ನ ಸಾಮೀಪ್ಯದೊಳು ಪರಿಪೂರ್ಣ ನಾನೀಗ
ಎದೆಯ ಆನಂದಕ್ಕೆ ಇಲ್ಲ ಎಲ್ಲೆ

ಒಲವದೇನೆಂದು ಅರಿತು ನಾ ಹೇಳುವುದೆ?
ಪದದಿ ಭಾವದ ಸಾರ ತುಂಬಬಹುದೇ?
ನಿನ್ನ ಸಂಗವೆ ಒಲವೆ? ನೀನು ಇರದಿರೆ ಒಲವೆ?
ಮೋಡಗಳ ತೆರದಲ್ಲಿ ಹೊಂಚುತಿಹುದೇ?

೩೦-೦೬-೨೦೧೨